Tá Seán ag ceapadh go bhfuil sé ag dul as a mheabhair agus tá Nuala idir dhá cheann na meá san ospidéal fad is atá an Ceannfort Ó Sé ag breathnú isteach sa domhan osnádúrtha agus é ar thóir na fírinne faoi na dúnmharuithe brúidiúla sa choill.
Anocht, sa chlár deireanach den tsraith scéinséara osnádúrtha Na Cloigne, faightear corp eile sa choill agus é lomnocht, gan chloigeann, cosúil leis an gcéad cheann. Agus na Gardaí ag déanamh gach iarracht an cás a réiteach, tuigeann an Ceannfort Ó Sé gur sa domhan osnádúrtha atá an freagra.
Tá Nuala gan aithne, gan urlabhra san ospidéal tar éis go bhfuarthas í ina carr bun os cionn i gCoill an Chloiginn. Tá sí trína chéile ag na radhairc scanrúla foréigneacha céanna a bhfuil Seán cráite leo de lá agus d’oíche.
Dhéanfadh Seán rud ar bith le Nuala a shábháil agus le deireadh a chur leis an bhforéigean i gCoill an Chloiginn, ach íocfaidh sé go daor as. An mbeidh an Ceannfort Ó Sé in ann cúnamh a thabhairt dó aghaidh a thabhairt ar a chuid áibhirseoirí agus an íobairt deiridh a dhéanamh chun Nuala a shábháil? Nó an bhfuil an fórsa olc osnádúrtha atá ag sní trí Choill an Chloiginn róchumhachtach lena chloí?
Is é Robert Quinn a stiúir Na Cloigne agus is é Ciarán Ó Cofaigh a léirigh é do ROSG, comhlacht léiriúcháin scannán agus teilifíse atá lonnaithe i gConamara.
Cláracha Eile: